एयरलाइन्सले दायित्व पन्छाउँदा विमानस्थलमा यात्रीको बिचल्ली

कपिलवस्तु गजेडाका दिनेश विक यतिबेला त्रिभुवन अन्तर्राष्ट्रिय विमानस्थलमा अलमलमा छन् । यो बर्खायाममा बुटबल– दाउन्ने–नारायणगढको हिलाम्मे बाटो छिचोल्दै काठमाडौं आइपुगेका हुन् उनी । यतिबेला साउदी अरब पुगिसक्नुपर्ने थियो । 

तर, इरान र कतारबीच तनाब बढेपछि खाडी जाने विमानहरु एकाएक रोकिए । यसको मार काठमाडौंमा दिनेशले पनि भोग्दैछन् । 

उनी घरबाट हिँड्दा सब ठिकठाक थियो, काठमाडौं आएपछि पो थाहा भयो उडान नै रद्द भएछ । उनी विदेश जान भिसा, कागजात र आफ्ना सरसामान सबै बोकेर त आए । तर, अब कहिले विमान उड्छ र साउदी पुग्न पाइन्छ भन्ने अन्योल छ । दिनेश काठमाडौंमा अलपत्र परेका छन् । 

उनलाई अब एयरलाइन्सले हात्तिसार गएर टिकटबारे बुझ्न भनिरहेको छ । तर, विरानो शहरमा उनी अलमलमा छन् । 

‘अचानक टिकट क्यान्शिल भयो । काठमाडौं बिहान ५/६ बजे आइयो । १० बजेको टिकट थियो । अहिलेसम्म उड्न पाइएन,’ उनी भन्छन्,‘एयरलाइन्सले हात्तिसार जान भन्छ । हामीलाई केही थाहा छैनन् किन जाने ? के का लागि जाने । सरकारले हामीलाई छिटो पठाउनुपर्‍यो ।’

झापाका किरणकुमार मुखिया सुनुवारको पनि दु:ख उस्तै हो । दुबई जान काठमाडौंमा आएका उनको सोमबार रातिको टिकट थियो । तर, उनी पनि उड्न पाएनन् । उनलाई कतारमा इरानको आक्रमणपछि उडान रोकिएको थाहा छ । 

तर, अब के गर्ने भन्ने थाहा छैन । न म्यानपावरले राम्रोसँग सूचना दिइरहेको छ, न एयरलाइन्स र विमानस्थल प्रशासनले नै । बिलखबन्दमा छन्, किरणकुमार ।  

‘कतारमा बमबारी भएका कारण उड्न रद्ध भएको भनियो । मिडियाहरुमा पनि त्यही देखियो । अहिलेसम्म आधिकारिक रुपमा केही जानकारी आएको छैन,’ उनी भन्छन्,‘रातिदेखि चिसो भुँइमा पानी परिरहेको थियो । त्यहीँ बस्नुपर्‍यो । एयरलाइन्सवालाहरुले बाहिर जानु । मेनपावरसँग सम्पर्क गर्न भन्छ । मेनपावरले एकछिन त्यहीँ बस भन्दैछ । के गर्ने दोधारमा छु ।’

अहिले त्रिभुवन विमानस्थलमा अलपत्रे पर्नेहरु धेरै छन् । कतिबेला उडानको सूचना आउाछ भनेर उनीहरु एयरपोर्टकै कुरिररहेका छन् । एयरलाइन्सले पनि यात्रीलाई खाना बस्नका  व्यवस्था गरेका छैनन् । 
विमानस्थलमै यात्रीहरु केहि  नयाँ खबर आउाछ कि भनेर कुरिरहेका छन् । तर, उनीहरुलाई सूचना दिने कोही छैनन् । स्पेन जानका लागि पोखराबाट काठमाडौं आएकी हिमा कार्कीको गुनासो पनि उस्तै छ  । 

‘हिजो पोखराबाट आए । होटलमा बसे । अहिले उड्न समयमा यहाँ आउँदा रोकिएको छ । पहिल्यै हामीलाई सूचनाहरु हुनुपर्थ्यो,’ उनी भन्छिन्,‘यदी रोकिने भए । केही जानकारी पाइएन । यो त हाम्रो सरकरको लापरबाही हो जस्तो लाग्छ । भोली अफिस जानु छ । नाति छोरी पनि सँगै छन् । अलपत्र परियो ।’

धेरै यात्रीहरुको गुनासो उस्तै छ । यसरी उडान रद्ध भएपछि एयरलाइन्सले होटलमा राख्नुपर्ने हो । धनगढीका रामकुमार सदार साउदी अरब जानका लागि रातरात काठमाडौं आए । तर अहिलेसम्म उड्न पाएका छैनन् । 

सोमबार राति विमान चढिसकेपछि एक घण्टा कुराइयो । अनि एकाकएक ओरालेर उनीहरुलाई विमानस्थलबाट बाहिर पठाइयो । तर, उनीसँग बाहिर होटलमा बस्ने पैसा नै छैन । 

‘२३ तारिखको फ्लाइट थियो । १० बजेर ५ मिनेटको फ्लाइटमा उड्न पाइएन । हामीलाई कुनै जानकारी दिइएन,’ उनी भन्छन्,‘ फ्लाइट क्यानिसल गरियो । पेलेनमा गएर एक डेढ घण्टा बसियो । पछि प्लेन उडेन ।’

आकस्मिक रुपमा उडान रद्ध हुँदा धेरै यात्रुहरुले विमानस्थलमा चिसो भुईंमै रात बिताएका छन् । अहिले पनि उनीहरुलाई उडानबारेका सूचनाहरु दिइएको छैन । त्यसैले प्रहरीले लखेट्दा पनि यात्रुको जाने ठाउँ छैन । 

अन्तर्राष्ट्रिय हवाई यात्रुलाई उडान रद्ध भएपछि एयरलाइन्सले होटलमा लगेर राख्ने चलन हुन्छ । यो उनीहरूको कानुनी दायित्व नै हो । 

तर, खाडी जाने यात्रुहरुलाई एयरलाइन्सले पनि अन्यायपूर्ण व्यवहार गरेको देखिन्छ । एयरपोर्टमा पनि उनीहरुलाई चैनका साथ बस्न दिइएको छैन । प्रहरीहरुले उनीहरुलाई बेला–बेलमा बाहिर जान दबाब दिइरहेका छन् ।