एउटा महंगो विवाह, जसको भइरहेको छ सार्वजनिक विरोध

दुलहीको गाउनको मूल्य १५ लाख डलर छ, अनि औंठीको मूल्य ५० लाख डलर । 

विवाहका लागि ९५ वटा प्राइभेट जेट बुक गरिएको छ, अनि ३० वटा वाटर ट्याक्सी । 

निम्तालुहरु हुनेछन्, विश्वकै अर्वपति, सेलिब्रिटी, अनि उच्च राजनीतिकर्मीहरु । 

बेहुला ६१ वर्षका छन् र बेहुली ५५ वर्षकी । 

र, यो विवाहलाई वेडिङ अफ दि सेञ्चुरी भनिएको छ । 

यो विवाह हो, विश्वकै तेस्रा धनी व्यक्ति एवं अमेजनका मालिक जेफ बेजोस र पूर्व टेलिभिजन प्रस्तोता लरेन साञ्चेजको । 

विवाह इटलीको भेनिसमा भइरहेको छ । विवाह समारोह बिहीबार सुरु भएको थियो, शनिबार सकिनेछ । 

अहिले यो विवाहले विश्वकै ध्यान खिचेको छ । एकातिर विवाहको उत्सव छ, अर्कोतिर भेनिस शहरमा यसको विरोध पनि । 

जेफ बेजोस र लरेन साञ्चेज, दुबै जनाको यो दोस्रो विवाह हो । 

जेफ बेजोसले सन् १९९३ मा मेकेन्जी स्कटसँग विवाह गरेका थिए । उनीहरुको दाम्पत्य जीवन २५ वर्षसम्म चल्यो । 

सन् २०१९ मा उनीहरुले सम्बन्धबिच्छेद गरे । 

त्यस्तै लरेन्ज सान्चेजले पनि सन् २००५ मा हलिउड एजेन्ट प्याट्रिक ह्वाइटसेल सँग विवाह गरेकी थिइन् । उनीहरुका एक छोरा र एक छोरी पनि छन् । उनले पनि सन् २०१९ मै सम्बन्धबिच्छेद गरिन् । 

भएको के थियो भने सन् २०१८ मा जेफ बेजोस र लरेन्ज आपसमा डेट गरिरहेको खबर सार्वजनिक भयो । 

त्यसपछि उनीहरुले आआफ्ना दम्पत्तिसँग सम्बन्धबिच्छेद गरे । 

त्यसपछि खुलेर प्रेम साट्न थाले । पछिल्लो समय यो जोडी विश्वका धेरै ठाउँमा सँगै घुमेको छ । धेरै इभेन्टहरुमा पुगेको छ । उनीहरुले यसअघि नै विवाह गर्न खोजेका थिए, तर अहिलेमात्र त्यो समय जुर्‍यो । 

अमेरिकी समाचार संस्था सीएनएनले १५ औं शताब्दीको चर्च मेडोना डेलओर्टोमा विवाह समारोह हुने भनेको छ । 

विवाह भोज भने भेनिसको आर्सनलमा हुनेछ । यो ठाउँ चारैतिर पानीले घेरिएको छ र पुल तरेपछि मात्र जान सकिन्छ । 

विवाहमा इलन मस्क, बिल गेट्स, मार्क जुकरबर्ग लगायतका अर्वपतिहरु सहभागी हुने अनुमान छ । 

डोनाल्ड ट्रम्पकी छोरी ज्वाइँ इवांका ट्रम्प र जेरेड कुशनरलाई पनि बोलाइएको छ भने लियोनार्दो डिक्याप्रियो, किम कार्डिसियन, केटरी परी लगायतका सेलिब्रेटीहरु पनि विवाह समारोहमा सहभागी हुने अनुमान छ । 

उनीहरुका लागि भेनिसका विलासी होटलहरु अमन भेनिस, सिप्रियानी ग्रिटी प्यालेसलगायतका आधा दर्जन होटल बुक गरिएको छ । 

बेजोसको विवाह समारोहका कारण भेनिसमा भिडभाड बढेको छ । सुरक्षाका कारण गाडीहरु डाइभर्सन र रिरुट गरिएका छन् । भेनिसमा पर्यटकहरुले भरिभराउ हुने सडकहरु बन्द गरिएको छ, खाली राखिएको छ । 

जेफ बेजोसको विवाहले भेनिसमा ग्लोबल एटेन्सन ल्याएको छ । तर अहिले भेनिस आएका पर्यटकहरुले बासको समस्या ब्यहोर्नुपरेको छ ।

ऐतिहासिक शहर भेनिसले यति भव्य समारोह आयोजना गर्न कठिन हुने पनि कतिपयले बताएका छन् । 

किनकी भेनिस शहर विश्वमै धेरै पर्यटकको आवागमन हुने शहर मानिन्छ । त्यही अर्वपतिहरुको जमघट हुँदा सुरक्षा व्यवस्था कडा हुने नै भयो ।

यसले पर्यटकहरुलाई असुविधा भएको भनेर विरोध भइरहेको छ ।

शहरका ठाउँ ठाउँमा नो स्पेस फर बेजोसको नारा लागिरहेको छ । स्थानीय तथा अभियन्ताहरुले यो विवाह खुला ठाउँमा नगरेर अरु नै ठाउँमा गर्नुपर्ने माग गरेका छन् । 

भेनिसका मेयरले भने यो विवाहले शहरलाई फाइदा हुने भन्दै समर्थन गरेका छन् । उनका अनुसार यो विवाहबाट भेनिसमा ४९ मिलियन युरोको व्यापार हुनेछ । 

जेफ बेजोस सन् १९६४ मा अमेरिकाको न्यू–मेक्सिकोमा जन्मिएका हुन् । उनले इ कमर्सको व्यापार विस्तारमा ठूलो भूमिका खेलका छन् ।

अनलाइन मार्केट प्लाटफार्म अमेजनको उनी संस्थापक र प्रमुख कार्यकारी अधिकृत हुन् । अमेजनले अहिले विश्वभर २४ सै घण्टा अनलाइन ब्यापार सञ्चालन गरिरहेको छ । 

उनी एकसमय विश्वकै धनी व्यक्ति थिए । मेकेन्जी स्कटसँग सम्बन्ध विच्छेद गर्दा उनले आधा सम्पत्ति दिनु परेको थियो । 

अहिले पनि बेजोसको कुल सम्पत्ति २३० बिलियन डलर छ । उनी अहिले विश्वका धनीहरुको सूचीमा तेस्रो स्थानमा छन् ।

उनीभन्दा अगाडि इलन मस्कको सम्पत्ति ३८५ बिलियन डलर छ र मार्क जुकरबर्गको २४६ बिलियन डलर छ । 

पूर्व टीभी प्रस्तोता लरेन सान्चेज सन् १९६९ मा अमेरिकाको न्यूमेक्सिकोमा जन्मेकी हुन् । रिपोर्टिङबाट करिअर सुरु गरेकी उनले फक्स स्पोर्टस् च्यानलमा मनोरञ्जनात्मक कार्यक्रमको प्रस्तोता लगायतका काम गरिन् । उनले पाइलट तालिम पनि लिएकी छन् । हाल उनी एक एभिएसन कम्पनीको मालिक छिन् ।