धनुषामा तस्कर समुहसंगको झडपमा ६ जना सशस्त्र प्रहरी घाइते

धनुषा जिल्लाको विदेह नगरपालिका–२ स्थित गोबराही इलाकामा तस्कर समूहसंगको झडपमा ६ जना सशस्त्र प्रहरी कर्मचारी घाइते भएका छन् ।

भारतबाट ल्याएका अवैध सामान राखेको सूचनाको आधारमा सशस्त्र प्रहरी बल, नेपाल नं. ८ गण धनुषा र प्रस्तावित सीमा सुरक्षा गुल्म महिनाथपुरबाट एक टोली बिहीबार गोबराही इलाकामा खटिएको थियो । खोजतलास गर्ने क्रममा एक वटा मोटरसाइकल फेला पारेको थियो ।

त्यसपछि नजिकैको टहरोमा खोजतलास गर्ने क्रममा सय-डेढ सय जनाले घरेलु हातहतियार र ढुंगामुढाले आक्रमण गरेका सशस्त्र प्रहरी बलका सहप्रवक्ता शैलेन्द्र थापाले जानकारी दिए ।

यस क्रममा ६ जना सशस्त्र प्रहरी कर्मचारी घाइते भएका हुन् । स्थिति नियन्त्रणमा लिन सशस्त्र प्रहरीले १३ राउण्ड ग्यास सेल र ४ राउण्ड हवाइ फायर गरेको थियो ।

घाइतेमध्ये ३ जना सामान्य उपचारपछि ठीक भएका छन्, तीन जनाको प्रादेशिक अस्पताल जनकपुरमा उपचार गरिएको सहप्रवक्ता थापाले जानकारी दिए ।