क्षतिपूर्ति भराएको बिरोधमा डाक्टरहरुले रोके बिरामीको उपचार

उपभोक्ता अदालतले अस्पताल र चिकित्सकबाट पीडितलाई क्षतिपूर्ति तिराएको विरोधमा नेपाल चिकित्सक संघले देशभरका अस्पतालमा आकस्मिक बाहेकको सेवा ठप्प पारेका छन् । 

नेपाल चिकित्सक संघको आह्वानमा देशभरका अस्पतालका चिकित्सकले आकस्मिक कक्षमा मात्र काम गरेका छन् । डाक्टरहरुले सोमबार बहिरंग विभागमा बिरामी नजाँच्दा धेरै सर्वसाधारण मर्कामा परेका छन् । 

स्वास्थ्य जाँचका लागि सोमबार अस्पताल पुगेका सर्वसाधारण डाक्टरहरुले नजाचेका कारण त्यसै फर्किन बाध्य छन् । काठमाडौंको वीर अस्पताल, त्रिवि शिक्षण अस्पताल, सिभिल अस्पताल, ललितपुरको पाटन अस्पताल, भक्तपुर अस्पताल लगायतका ठूला अस्पतालमा दैनिक सयौं जनाले बहिरंगमा उपचार सेवा लिन्थे । तर डाक्टरहरुको आन्दोलनका कारण उनीहरु अलपत्र परेका छन् । 

उपभोक्ता अदालतले हालसम्म स्वास्थ्य सेवासँग सम्बन्धित तीनवटा मुद्दामा डाक्टर र अस्पतालबाट क्षतिपूर्ति भराउन आदेश दिएको छ । ओम अस्पताल, हिमाल अस्पताल र ग्राण्डी सिटी अस्पताल र त्यहाँ उपचार गर्ने डाक्टरविरुद्ध छुट्टाछुट्टै मुद्दा परेको थियो । त्यसमा उपभोक्ता अदालतले डाक्टर र अस्पतालले पीडितलाई क्षतिपूर्ति भराउने फैसला गरेको छ । 

चिकित्सकहरुले भने चिकित्सा पेशामा कुनै पनि कुराको ग्यारेन्टी नहुने भन्दै खोजेजस्तो उपचार नपाउँदैमा चिकित्सकविरुद्ध मुद्दा हाल्नु जायज नहुने बताएका छन् । 

चिकित्सक संघका अध्यक्ष अनिलबिक्रम कार्कीले स्वास्थ्य सेवालाई पनि टेलिफोन वा विद्युत सेवामा जस्तो ग्यारेन्टी खोजेर क्षतिपूर्ति गराउनु बेठीक भएको बताए ।