त्रिविको उपकुलपतिमा दीपक अर्याल नियुक्त

त्रिभुवन विश्वविद्यालयको उपकुलपतिमा प्रा. डा. दीपक अर्याल नियुक्त भएका छन् ।

त्रिविका कुलपतिसमेत रहेका प्रधानमन्त्री केपी शर्मा ओलीले अर्याललाई उपकुलपति नियुक्त गरेका हुन् ।

यसअघि सोमबार साँझ शिक्षा, विज्ञान तथा प्रविधिमन्त्री रघुजी पन्त नेतृत्वको सिफारिस समितिले उपकुलपतिका लागि ३ जनाको नाम प्रधानमन्त्री ओलीसमक्ष सिफारिस गरेको थियो ।

उपकुलपति अर्याल त्रिविको जल तथा मौसम केन्द्रीय विभागका विभागीय प्रमुख भइसकेका प्राध्यापक हुन् । उनी हाँस्यब्यंग्य निबन्धकार भैरव अर्यालका छोरा हुन् ।

कम विद्यार्थी र चर्चा कम हुने जल तथा मौसम विभागका प्राध्यापक हुनाले त्रिवि बाहिर उनलाई कमैले चिन्छन् । तर उनलाई नजिकबाट चिन्नेहरु प्राज्ञिक छवि भएको र कामप्रति लगाव भएको प्राध्यापक मान्छन् । एमाले निकट अर्याल स्वच्छ छविका र राजनीतिक नियुक्तिहरुमा धेरै अवसर नपाएका प्राध्यापक हुन् ।