संघीय मामिलामन्त्री गुप्ताले दिए राजीनामा

विचौलियासँग घुस लेनदेनको बार्गेनिङ गरेको अडियो सार्वजनिक भएपछि संघीय मामिला तथा सामान्य प्रशासनमन्त्री राजकुमार गुप्ताले राजीनामा दिएका छन् । 

उनले आफूमाथि लागेका आरोप अनुसन्धान गरी सत्य तथ्य कुरा बाहिर ल्याउन सहयोग पुगोस् भनेर मन्त्री पदबाट राजीनामा दिएको फेसबुकमार्फत बताएका छन् । 

भूमि आयोग कास्कीको अध्यक्ष नियुक्तिका लागि विचौलियाले मन्त्रीलाई घुस अफर गरेको अडियो केही दिनअघि सार्वजनिक भएको थियो । 

उनले आफूलाई नखाएको विष लागेको पनि टिप्पणी गरेका छन् । उनले घुस डिलको अडियोलाई प्रविधिको उच्चतम प्रयोगको शिकार भएको पनि बताएका छन् ।

'प्रविधिको उच्चतम प्रयोगको शिकार अब अरु कोही पनि नबनुन् भन्ने अपेक्षा गर्दै आजसम्म विभिन्न रुपले आफूलाई सहयोग गर्नुहुनेहरुलाई हार्दिक धन्यवाद व्यक्त गर्दछु', उनले भनेका छन् ।