साफ यु–२० महिला च्याम्पियनसिपमा भुटानमाथि नेपालको फराकिलो जित 

बंगलादेशमा भइरहेको साफ यु–२० महिला च्याम्पियिनसिपमा नेपालले भुटानलाई ८–० को फराकिलो अन्तरले हराएको छ । 

नेपालका लागि पूर्णिमा राई र मीना देउवाले ह्याट्रिक पूरा गरे । एकपक्षीय खेलमा नेपालले पहिलो मिनेटमै गोलको खाता खोलेको थियो । 

मीना देउवाको गोलबाट अग्रता लिएको नेपालका लागि दोस्रो गोल समीक्षा मगरले नवौं मिनेटमा गरिन् । 

त्यसपछि मीनाले १२ औं मिनेटमा गोल गर्दै खेल ३–० को अवस्थामा ल्याइन् । खेलको २३ औं मिनेटमा एक र पहिलो हाफको इन्जुरी समयमा लगातार दुई गोल गर्दै पूर्णिमाले ह्याट्रिक पूरा गरिन् । 

६३ औं मिनेटमा कुसुम खतिवडा गोल गरिन् र ६५ औं मिनेटमा मीना देउवाले गोल गर्दै ह्याट्रिक पूरा गर्दा नेपाल ८–० ले विजयी भयो ।