बलात्कार आरोपमा मधेशका पूर्वप्रदेश प्रमुख पक्राउ

मधेशका पूर्व प्रदेश प्रमुख राजेश अहिराज पक्राउ परेका छन् । बलात्कारको उजुरी परेपछि फरार रहेका अहिराजलाई जिल्ला प्रहरी परिसर काठमाडौंको टोलीले शनिबार पक्राउ गरेको हो । 

आइतबार जिल्ला अदालत काठमाडौंले उनलाई ५ दिन हिरासतमा राखेर अनुसन्धान गर्न प्रहरीलाई अनुमति दिएको छ ।

जिल्ला प्रहरी परिसर काठमाडौंका प्रवक्ता अपिलराज बोहराका अनुसार बलात्कारको आरोप लागेका अहिराजविरुद्ध २०८१ चैत २५ गते जिल्ला अदालत काठमाडौंले पक्राउ अनुमति दिएको थियो ।

उनीविरुद्ध काठमाडौं बानेश्वरकी एक युवतीले २०८१ कात्तिकमा नै बलात्कारको उजुरी दिएकी थिइन् । पक्राउ पुर्जी जारी भएपछि अहिराज फरार रहँदै आएका थिए । 

उनी २०७७ फागुन ७ देखि २०७८ साउन ३२ गतेसम्म मधेशको प्रदेश प्रमुख थिए ।