५ वर्ष भन्दा बढी हेडसर भएकाहरुको पद धरापमा

शिक्षा तथा मानव स्रोत विकास केन्द्रले सरकारी स्कुलको प्रधानाध्यापकमा कार्यकाल पूरा गरेकाहरुले नै निरन्तर काम गरेको  पाइएको भन्दै चासो व्यक्त गरेको छ । 

केन्द्रले गत साउन ७ गते जिल्ला शिक्षा समन्वय इकाइलाई पत्र लेखेर कोही प्रधानाध्यापकले कार्यकाल पूरा गरेपछि पनि काम गरिरहेको भए नयाँ नियुक्त गर्न निर्देशन दिएको छ ।

सरकारी विद्यालयमा प्रधानाध्यापकको कार्यकाल ५ वर्षको हुन्छ । धेरै विद्यालयमा ५ वर्ष कार्यकाल पूरा गरेका प्रधानाध्यापकले फेरि नियुक्ति नलिई निरन्तर काम गरिरहेका छन् । 

यस विषयमा अख्तियार दुरुपयोग अनुसन्धान आयोग र राष्ट्रिय सतर्कता केन्द्रमा उजुरी परेपछि शिक्षा मन्त्रालयले शिक्षा तथा मानव स्रोत विकास केन्द्रलाई आवश्यक कारबाही गर्नु भनेर पत्र पठाएको थियो । 

त्यसपछि केन्द्रले जिल्ला शिक्षा समन्वय इकाइलाई पत्र लेखेर कार्यकाल पूरा गरेका हेडसरको ठाउँमा नयाँ नियुक्त गर्न भनेको हो ।