भारतको उत्तराखण्डमा भीषण बाढीले बस्ती नै बगायो, ४ जनाको मृत्यु, धेरै मानिस बेपत्ता

भारतको उत्तराखण्ड प्रदेशको उत्तरकाशी जिल्लामा भीषण वर्षापछिको बाढीले बस्ती नै बगाउँदा ४ जनाको मृत्यु भएको छ, धेरै मानिसहरु बेपत्ता भएका छन् ।

उत्तरकाशी जिल्लाको धराली क्षेत्रमा भीषण वर्षापछि बाढी आउँदा खीर गंगा नदी किनारको बस्तीका घर, होटल, होमस्टे र गाउँ नै बगाएको छ । घटनापछि भारतको प्रहरी, सेना र विपद उद्दार टोली घटनास्थलमा पुगेको छ । 

स्थानीय अधिकारीहरुका अनुसार बाढीका कारण धेरै घरहरु सोत्तर भएका छन् । एक स्थानीय बासिन्दाले भारतीय समाचार संस्था पीटीआईलाई बताए अनुसार करिब २० देखि २५ वटा घर, होटल र गेस्ट हाउस बाढीले नष्ट पारेको छ । 

भारतीय सेनाका अनुसार दिउँसो १ः४५ बजे लेदो माटोसहित खीर गंगा नदीमा बाढी आएको थियो । 

घटनापछि प्रधानमन्त्री नरेन्द्र मोदी र गृहमन्त्री अमित शाहले उत्तराखण्डका मुख्यमन्त्री पुष्करसिंह धामीसँग कुरा गरेका छन् । उनीहरुले उद्दारका लागि सबै प्रयास गर्न आग्रह गरेका छन् ।