कस्तो छ इलेक्ट्रिक स्कुटर चेतक ?

नेपालमा नाम चलेको ब्राण्डले इलेक्ट्रिक स्कुटर ल्याएनन् । नयाँ ब्राण्डहरुमाथि उपभोक्ताले विश्वास नै गर्न सकेनन् ।  त्यही कारण इभी गाडीको एडपटेसन रेट हाइ हुँदापनि दुई पाङ्ग्रे सवारीमा भने इभीको प्रयोग किनै कम छ । 

अब भने विश्वासिलो ब्राण्डको इलेक्ट्रिक स्कुटर नेपाली बजारमा आइसकेको छ । यसको नाम हो, चेतक ।

बजाजले सन् २००५ सम्म चेतक नाममा पेट्रोल स्कुटर उत्पादन गर्दै आएको थियो । १४ वर्षपछि २०२० मा चेतककै विद्युतीय भर्सन उत्पादन थालेको थियो । बजाजको आधिकारिक विक्रेता हंसराज हुलासचन्द एण्ड कम्पनी प्रालिले सोमबार नेपाली बजारमा चेतक लन्च गरेको छ । 

लुक्स क्लासिक छ, टेक्नोलोजी मोडर्न छ । यसको सिट कम्फर्टेबल छ । मेटलबाटै बनेको स्कुटरको बडी साइनी छ ।

यसमा ३.५ किलोवाटको ब्याट्री छ । एक पटक फुलचार्ज गरेपछि १५३ किलोमिटरसम्म रेन्ज दिने बिक्रेताको दाबी छ । फास्ट चार्जिङ पनि सपोर्ट गर्छ र, ३ घण्टा चार्ज गर्दा ८० प्रतिशत चार्ज हुन्छ । 
यो स्कुटरले अधिकतम ७३ किलोमिटर प्रतिघण्टाको स्पिड दिन्छ । 

चेतकमा केही सेफ्टी फिचरहरु पनि राखिएका छन् । ओभर स्पिडमा वार्निङ दिन्छ । चोरी हुनबाट रोक्नका लागि लक गर्ने सुविधा पनि छ । अनि, मोबाइल एपबाट स्कुटर नियन्त्रण र रेखदेख गर्न सकिन्छ । 

बजाज अटोका एसिया रिजन भाइस प्रेसिडेन्ट मनिष थापरले यो स्कुटर युवालाई लक्षित गरेर डिजाइन गरेको बताएका छन् । यो स्कुटर शहरभित्रको प्रयोगका लागि उपयुक्त हुने मानिएको छ ।  

चेतकको स्मार्ट फिचर र इको फ्रेन्डली डिजाइनलाई नेपाली ग्राहकले मन पराउने गोल्छा ग्रुपका निर्देशक अभिमन्यू गोल्छाको विश्वास छ । 

नेपाली बजारमा यसको मूल्य ३ लाख २४ हजार ९०० रुपैयाँ तोकिएको छ । 

चेतकको बुकिङ खुला भइसकेको छ । नक्सालमा रहेको बजाज शोरुममा गएर वा साउन २१ गते भृकुटीमण्डपमा सुरु हुने नाइमामा गएर पनि बुक गर्न सक्नुहुनेछ ।