रास्वपाको आक्रोश : पटक पटक उपसभामुखको तेजोबध नगर्नुस् 

राष्ट्रिय स्वतन्त्र पार्टीले कांग्रेस र एमालेले पटक पटक उपसभामुखको तेजोबध गरेको भन्दै विरोध जनाएको छ । बुधबारको प्रतिनिधिसभा बैठकमा रास्वपा संसदीय दलका प्रमुख सचेतक सन्तोष परियारले कांग्रेस र एमालेले सांसदहरुको विवेकलाई समेत बन्धक बनाएर हस्ताक्षर संकलन गरेको आरोप लगाए । 

राष्ट्रिय स्वतन्त्र पार्टीबाट सांसद निर्वाचित उपसभामुख इन्दिरा रानामगरले पद अनुकुलको आचरण नगरेको भन्दै कांग्रेस र एमालेले हटाउने तयारी गरेका छन् । त्यसका लागि मंगलबारदेखि सांसदहरुको हस्ताक्षर संकलन गरिएको छ । 

अमेरिकामा हुने एक कार्यक्रममा जाने केही व्यक्तिहरुको भिसा सहजीकरण गरिदिन भन्दै उपसभामुख रानाले गत वर्ष अमेरिकी दूतावासलाई एक पत्र लेखेको सार्वजनिक भएको थियो । 

उपसभामुखले मानिसहरुलाई अवैध रुपमा विदेश पठाउन सहयोग गरेको भन्दै गत वर्ष कांग्रेस र एमाले सांसदहरुले विरोध जनाएका थिए । अहिले एक वर्षपछि त्यही विषय उठाएर उपसभामुख हटाउन खोजेपछि रास्वपा विरोधमा उत्रिएको हो । 

‘सार्वभौम संसदको तेजोवध गर्ने र उपसभामुख जस्तो पदको अवमूल्यन गर्ने र सधैं लखेटिरहने कांग्रेस र एमाले गम्भीर भइदिनुस् यो देश आउने पुस्तालाई पनि चाहिन्छ, यो लोकतन्त्र र यो व्यवस्था आउने पुस्तालाई चाहिन्छ, आफ्नो स्वार्थका लागि यो व्यवस्थामाथि  आक्रमण नगर्नुस्’ सांसद परियारले भने । 

उनले पछिल्ला दिनमा बालुवाटार, बुढानीलकण्ठ र सिंहदरबारका बैठकमा उपसभामुखमाथि लगातार आक्रमण भएको भन्दै विरोध जनाए । 

हरेक सांसदहरु आफैंमा सार्वभौम हो भन्दै उनले सांसदको विवेकलाई हस्ताक्षरमा परिणत गरेर जुन बेला चाहियो त्यही बेला राजनीतिक स्वार्थ पूर्ति नगर्न कांग्रेस र एमालेलाई आग्रह गरे । 

उनले राष्ट्रिय स्वतन्त्र पार्टीलाई निषेध गर्न खोजिएको र यो लोकतन्त्रकै लागि खतरा भएको बताए । ‘हामीलाई कमजोर बनाउन खोजिएला तर कुनै पनि नयाँहरुलाई निषेध गर्न सकिँदैन’, उनले भने ।