सुनुवाइ समिति छाडेर राज्य व्यवस्थाको सभापति बनिन् न्यौपाने

प्रतिनिधिसभाको राज्य व्यवस्था तथा सुशासन समितिको सभापतिमा ईश्वरी न्यौपाने निर्विरोध भएकी छन् । मंगलबार भएको निर्वाचन प्रक्रियामा सभापतिमा उनको मात्र उम्मेदवारी परेको छ । अब उनी निर्वाचित भएको घोषणा भने बुधबार हुनेछ ।

राज्य व्यवस्था समितिका यसअघिका सभापति रामहरि खतिवडाले राजीनामा दिएपछि उनकै पार्टी नेपाली कांग्रेसबाट अर्की सांसद न्यौपाने सभापति चयन हुन लागेकी हुन् ।

राज्य व्यवस्था समितिको सभापति हुन न्यौपानेले मंगलबार नै संसदीय सुनुवाइ विशेष समितिबाट राजीनामा दिएकी थिइन् ।

राज्य व्यवस्था समितिले संघीय निजामती सेवा विधेयकमा निजामती सेवाका कर्मचारीले अवकाश भएको २ वर्षसम्म अर्को नियुक्ति लिन नपाउने व्यवस्था राख्ने सहमति गरेको थियो । जसलाई कुलिङ पिरियड भनेर चिनिन्छ । तर प्रतिनिधिसभाबाट पारित हुँदा मुख्य सचिव, सचिव र सहसचिवलाई कुलिङ पिरियड नलाग्ने व्यहोरा पारित भएको थियो ।

त्यसपछि गठित छानबिन समितिले सभापतिको हैसियतमा खतिवडाको पनि कमजोरी भएको औंल्याएपछि उनले राजीनामा दिएका थिए ।