जग्गा कारोबारको लेनदेन नमिलेपछि अपहरण, ३ जना पक्राउ

सोमबार दिउँसो काठमाडौंको तारकेश्वर नगरपालिका–७ फुटुङका राम पण्डित फुटुङ चोकको एक होटलमा चिया खाइरहेका थिए । दिउँसो साढे ३ बजेतिर ३ जना मानिस आएर उनलाई एक्कासी मोटरसाइकलमा राखेर साङ्लातिर लगे । 

पण्डितका परिवारका सदस्यले प्रहरीलाई खबर गरे । साढे चार बजेतिर प्रहरी प्रभाग नेपालटार र प्रहरी वृत्त बालाजुको टोली खोजी कार्यमा खटियो । पण्डितलाई तारकेश्वर नगरपालिका–१ साङ्लास्थित मंगल दासको घरभित्र राखेको अवस्थामा प्रहरीले फेला पार्‍यो । 

जिल्ला प्रहरी परिसर काठमाडौंका प्रवक्ता एसपी अपिलराज बोहराका अनुसार मंगल दासको समूहले पण्डितलाई कब्जामा लिएको थियो । मंगल दास र राम पण्डितबीच लेनदेन विवाद थियो । 

उनीहरुले जुटको डोरीले पण्डितको हात बाँधेर मोटरसाइकलमा राखेर साङ्ला पुर्‍याएका थिए । त्यसपछि कुटपिट गर्नुका साथै मोवाइल समेत कब्जामा लिए । त्यसपछि उनीहरु पण्डितको घरमा गएर उनकी श्रीमतीसँग बैंकको चेक मागेर त्यसमा २ करोड २३ लाख ५० हजार अंक भरेका थिए । तर त्यसमा पण्डितले हस्ताक्षर गरेका थिएनन् । 

प्रहरीका अनुसार पण्डितले जग्गासम्बन्धी कारोबारमा मंगल दासलाई ६३ लाख ५० हजार रुपैयाँ दिनुपर्ने देखिएको थियो । 

त्यसपछि दासले आफ्ना साथीहरुको सहयोगमा पण्डितलाई कब्जामा लिएका थिए । प्रहरीले मंगल दाससँगै अपहरणमा संलग्नको आरोपमा साङ्लाका राज लवट खत्री र फुटुङका सन्तोष महर्जनलाई पक्राउ गरेको छ ।

उनीहरुलाई ३ दिन हिरासतमा राख्न प्रहरीले अदालतबाट अनुमति लिएको छ । घटनाको प्रहरी वृत्त बालाजुले अनुसन्धान गरिरहेको छ ।