सामाजिक सञ्जाल प्रतिबन्धमा देउवा : दर्ता गर्न त आउनु पर्ने हो 

२१ भदौ, काठमाडौं । नेपाली कांग्रेसमा सामाजिक सञ्जाल बन्द गर्ने सरकारको निर्णयमा प्रश्न उठाएका छन् ।

मनाङ प्रदेशसभाको उपचुनावका लागि दल दर्ताबारे निर्णय गर्न आइतबार विहान कार्यसम्पादन समितिको बैठक बोलाइएको थियो । बैठकमा नेताहरुले सामाजिक सञ्जाल बन्द गर्ने सरकारको निर्णयको विरोध गरे ।

महामन्त्री गगन थापा, नेताहरु विमलेन्द्र निधि, अर्जुननरसिंह केसी लगायतका नेताहरुले सामाजिक सञ्जाल बन्द गरेर समस्या समाधान नहुने बताए । उनीहरुले यसबारे पार्टीे औपचारिक रुपमा बोल्नुपर्ने समेत माग गरेका थिए । 

सहमहामन्त्री डीना उपाध्यायले पनि सामाजिक सञ्जाल नियमन गर्नुपर्छ, तर पूर्ण रुपमा बन्द गर्नु राम्रो नभएको बताइन् । उनले भनिन्, ‘यसमा रणनीति तयार गरेर सरकारलाई सुझाव दिनुपर्छ, कांग्रेस बोल्नुपर्छ ।’

नेता अर्जुनरसिंह केसीले भोलि जेनजी पुस्ताले गर्ने प्रदर्शनबारे बैठकमा कुरा उठाएका थिए । सामाजिक सञ्जाल राजनीति मात्र होइन, दुखसुखको साथी भइसकेको भन्दै उनले भने, 'अविछिन्न स्वतन्त्रता अपहरण गर्ने काममा कांग्रेस मुकदर्शक बस्नु हुँदैन, बाटो खोज्नुपर्छ ।’

जवाफमा सभापति शेरबहादुर देउवाले ‘दर्ता गर्न त आउनु पर्ने हो’ भनेका थिए । त्यसपछि नेताहरुले सर्वोच्च अदालतले पनि कानुन बनाएर नियमन गर भनेको स्मरण गराए । 

अहिले सरकारले निर्देशिकाको आधारमा नेपालमा दर्ता नभएका सामाजिक सञ्जालहरु बन्द गर्ने निर्णय गरेको हो । यससँगै फेसबुक, युट्युब, ह्वाट्सएप लगायतका सञ्जाल बन्द भएका छन् ।

कांग्रेस सहमहामन्त्री जीवन परियारका अनुसार कार्यसम्पादन समितिको बैठकमा पर्यटनमन्त्री बद्री पाण्डे बाहेक अरु मन्त्रीहरु थिएनन् ।

त्यसैले यसबारे सरकारको धारणा बुझ्ने र औपचारिक रुपमा पार्टीको धारणा बाहिर ल्याउने समझदारी भएको छ । उनले भने, ‘एकदुई दिनमै हामी हाम्रो धारणा सार्वजनिक गर्छौं ।’