काठमाडौं महानगरका विद्यालय भोलि खुल्ने, सहज भए सोमबादेखि पढाइ

काठमाडौं महानगरपालिकाभित्रका विद्यालय भोलि खुल्ने भएका छन् । तर पठनपाठन भने सोमबारदेखि मात्र हुने भएको छ । 

महानगरपालिकाको शिक्षा विभागले शनिबार एक सूचना जारी गरी आइतबारदेखि शिक्षक र कर्मचारीहरु विद्यालयमा उपस्थित हुन आग्रह गरेको छ । 

तर आइतबार नै विद्यार्थीहरुलाई भने विद्यालयमा नबोलाउन भनिएको छ । 

आइतबार शिक्षक र कर्मचारी उपस्थित भएर विद्यालयको सरसफाइ गर्ने र कुनै प्रकारको क्षति देखिए महानगरपालिकालाई विवरण उपलब्ध गराउन विभागका निमित्त प्रमुख केशव ज्ञवालीले आग्रह गरेका छन् । 

त्यस्तै विद्यालयका अभिभावकसँग सम्पर्क गरेर विद्यार्थीको अवस्था बुझ्ने, अवस्था सामान्य नहुन्जेलसम्म आफ्ना बालबालिका विद्यालय ल्याउन र लैजाने काम गर्न आग्रह गर्न पनि महानगरपालिकाले भनेको छ । 

अभिभावकले विद्यार्थी ल्याउने र लैजाने जिम्मा लिएमा भदौ ३० गते सोमबारदेखि मनोसामाजिक परामर्श र अध्ययन अध्यापन गराउन महानगरपालिकाले आग्रह गरेको छ । 

अभिभावकसँग आउन र जान नसक्ने विद्यार्थीलाई भर्चुअल क्लास सञ्चालन गर्न पनि महानगरपालिकाले आग्रह गरेको छ । 

भदौ २३ र २४ गते भएको आन्दोलनका कारण ५० भन्दा बढीको मृत्यु भएको छ भने सरकारी र निजी सम्पत्तिमाथि अर्बौंको क्षति भएको  छ । कतिपय शिक्षालयहरु पनि तोडफोड र आगजनी भएका छन् ।