इजरायलको आक्रमणपछि धमाधम तेहरान छाड्दै इरानी

शुक्रबार सुरु भएको इजरायली आक्रमणका कारण इरानको राजधानी तेहरानको अवस्था बेहाल छ । 

तीन दिनदेखि मिसाइल आक्रमण भइरहेको छ । कतिबेला आफ्नै घरमाथि बम खस्ने हो भन्ने त्रासमा छन् तेहरानका बासिन्दा । उनीहरु तेहरान छाडेर भाग्न चाहन्छन् । ग्रामीण इलाकातिर जान चाहन्छन् । तर तेहरान छाडेर जान सजिलो छैन । 

सडकमा लामो जाम छ । पेट्रोल पम्पमा पनि त्यत्तिकै लाइन छ । मानिसहरु बेचैन छन् । 

‘प्रष्ट भन्नुपर्दा तेहरान सुरक्षित छैन’, तेहरानका एक नागरिकले बीबीसीसँग भनेका छन्, ‘हामीले इजरायली आक्रमणको कुनै वार्निङ पाउँदैनौं । केबल पड्किएपछि मात्र थाहा हुन्छ ।’

इजरायलले शुक्रबार इरानमाथि एक्कासी आक्रमण गरेको थियो । पहिलो दिनकै आक्रमणबाट इरानी सैन्य अधिकारी र न्युक्लियर साइन्टिस्ट मारिएका छन्, आणविक केन्द्रहरु ध्वस्त भएका छन् । 
इजरायलले आणविक केन्द्रहरुलाई मात्र निशाना बनाएको बताएको छ । तर तेहरानको आवासीय क्षेत्रमा पनि मिसाइल खसेको छ । 

इजरायली आक्रमणमा परी सोमबारसम्म इरानमा २२४ जनाको मृत्यु भइसकेको छ । तीमध्ये ९० प्रतिशत सर्वसाधारण छन् । 

राजधानी शहर तेहरानको मुख्य क्षेत्रमै निरन्तर बम पड्किरहेको छ । सोमबार बिहान इजरायली सैनिकले इरानको आणबिक केन्द्रहरुमा निरन्तर एयर स्ट्राइक गर्ने चेतावनी दिएको छ । 

इरानकी एक महिलाले बीबीसीसँग भनेकी छन् कि उनी दुई हप्तादेखि निदाउन सकेकी छैनन् । यो घटनाले सन् १९८० को दशकको इरान इराक युद्धको बम आक्रमण सम्झाएको उनले बताएकी छन् । ‘त्यतिबेला साइरन बजाएर कतिबेला बम पड्किन सक्छ भन्ने पूर्वसूचना दिइन्थ्यो, तर अहिले त्यस्तो छैन’ उनले भनेकी छन् । 

तेहरानको युवा पुस्ताले पहिलो पटक युद्धको त्रासदी भोगिरहेको छ । अल जजिराका अनुसार सन् १९८८ मा इरान–इराक युद्धबाहेक इरानसँग युद्धको खासै अनुभव छैन । 

गत वर्ष पनि इजरायलले इरानमाथि केही आक्रमण गरेको थियो । तर त्यसको तुलना अहिलेको आक्रमणसँग हुँदैन । 

इरान सरकारले मेट्रो स्टेशन, स्कुल र मस्जिदहरुलाई आश्रयस्थलको रुपमा प्रयोग गर्ने बताएको छ । तर स्कुल र मस्जिदहरु पनि सुरक्षित देखिएका छैनन् । 

इरानमा इन्टरनेट पनि आउने जाने भइरहेको छ । तेहरान छाडेर बाहिर गएकाहरु आफन्त र साथीभाइलाई म्यासेज गरिरहन्छन् । तर तेहरानबाट रिप्लाइ पाउन सक्दैनन् । 

तेहरानका बासिन्दालाई इजरायली सैनिकहरुले पनि म्यासेज पठाइरहेको छ । उनीहरुले तेहरानको सैन्य इलाका छाड्न भनेका छन् । यो म्यासेजले सर्वसाधारणलाई झन् हैरानी दिएको छ । ‘हामीले कसरी थाहा पाउने कि यो ठाउँ सैन्य क्षेत्र हो कि होइन भनेर,’ तेहरानका एक युवकले बीबीसीसँग भनेका छन् ।

इजरायली आक्रमणको जवाफमा इरानले पनि जवाफी मिसाइल प्रहार गरिरहेको छ । 

इरानको आक्रमणका कारण १३ जना इजरायलीको मृत्यु भएको छ भने ३८० जना घाइते भएका छन् । सबैभन्दा बढी आक्रमण भएको क्षेत्र बात याम भन्ने शहरमा हो । जहाँ ६० भन्दा बढी घरहरु ध्वस्त भएका छन् । तर इरानको जस्तो अवस्था छैन । 

इजरायलको प्रतिरक्षा प्रणाली बलियो छ । शुक्रबार इरानमाथि आक्रमण गरे लगत्तै आपतकाल घोषणा गरेको छ र सबै नागरिकलाई सुरक्षित स्थानमा बस्न भनेको छ । मिसाइल आक्रमणको पूर्व सूचना दिने साइरन र मोबाइल अलर्ट बजिरहेको छ ।

अनि इजरायलको नेतृत्व अझ आक्रामक देखिएको छ । इजरायलले इरानी सर्वोच्च नेता अयोतुल्ला अलि खामेनीलाई खोजिरहेको समाचारहरु अन्तर्राष्ट्रिय सञ्चार माध्यमहरुमा आएका छन् । 

अमेरिकी अधिकारीहरुले दाबी गरेका छन् कि राष्ट्रपति ट्रम्पले खामनीको हत्या गर्ने योजना अस्वीकार गरेका छन् । 

राष्ट्रपतिले सार्वजनिक रुपमा केही बोलेका छैनन्, तर अधिकारीहरुलाई उध्रित गर्दै अमेरिकी सञ्चारमाध्यमहरुले बताएअनुसार राष्ट्रपति ट्रम्पले खामेनीको हत्या गर्ने योजना ठीक होइन भनेका छन् । 

फक्स न्यूजलाई दिएको अन्तर्वार्तामा इजरायली नेतान्याहूले ट्रम्पले भिटो प्रयोग गरेको विषयमा प्रष्टसँग खण्डन वा पुष्टि दुबै गरेनन् । उनले भने, ‘यस्ता धेरै झुटा रिपोर्टहरु छन्, जो कहिल्यै भएको थिएन । त्यसैले म यसबारे केही बताउन चाहन्न ।’ 

तर इजरायलले जे गर्नुछ, त्यो चाहिँ गरिछाड्ने उनले बताए । एक इजरायली अधिकारीले सीबीएस न्यूजलाई बताए अनुसार सिद्धान्ततः इजरायल राजनीतिक नेताको हत्या गर्न चाहँदैन । परमाणु र सैन्य विषयमा मात्र ध्यान केन्द्रित छ । 

तर यस कार्यक्रमबारे निर्णय लिने कुनै पनि व्यक्ति स्वतन्त्र र आरामसँग बस्न नसक्ने उनको दाबी छ ।