बागमतीमा कांग्रेस संसदीय दलको नेताको चयन भोलि  

नेपाली कांग्रेसको बागमती प्रदेश संसदीय दलको नेता चयनका लागि बुधबार नै निर्वाचन हुने भएको छ ।

निर्वाचन समितिले साउन १४ गते निर्वाचन गर्ने गरी कार्यतालिका सार्वजनिक गरेको छ । निर्वाचन समितिका संयोजक हरिशरण श्रेष्ठका अनुसार साउन १४ गते बिहान ८ बजे मतदाता नामावली प्रकाशन हुनेछ ।

उम्मेदवारका लागि दरखास्त दिने समय बिहान १० देखि ११ बजेसम्मलाई तोकिएको छ । उम्मेदवारले दिउँसो १२ बजेदेखि १ बजेसम्म नाम फिर्ता लिन पाउनेछ । मतदानको समय भने दिउँसो २ देखि ३ बजेसम्मलाई तोकिएको छ । 

मंगलबार कांग्रेसको बागमती प्रदेश संसदीय दलका नेता बहादुर सिंह लामाको विश्वास प्रस्तावमाथि मतदान भएको थियो । जसमा लामाको विपक्षमा २२ जना र पक्षमा १५ जनाले मात्र मत दिएपछि उनी पदमुक्त भएका छन् । 

उनी पदमुक्त भएपछि अर्को संसदीय दलको नेता चयनका लागि मतदान हुन लागेको हो । बागमतीमा कांग्रेसका नेता इन्द्रबहादुर बानियाँ संसदीय दलको नेताको आकांक्षी छन् ।